மகான் ஸ்ரீராமானுஜருக்கு இது ஆயிரமாவது வருடம்
மகான் ஸ்ரீராமானுஜருக்கு இது ஆயிரமாவது வருடம். அதாவது ஆயிரமாவது ஜயந்தி. சித்திரை மாத திருவாதிரைதான் அவர் அவதரித்த புண்ய தினம்.
வருகிற 10ம் தேதி செவ்வாய்க்கிழமை ஸ்ரீராமானுஜர் ஜயந்தி. அனைத்து பெருமாள் கோயில்களிலும் விமரிசையாகக் கொண்டாடப்படும்.
அவர் அவதரித்த ஸ்ரீபெரும்புதூர் தலத்தில் கோலாகலமாக நடைபெறும் திரு அவதார விழா. இந்த வேளையில், ஸ்ரீராமானுஜரை அறிந்து கொள்வோமா?
ஆதிசேஷன் அவதாரமென்று போற்றப்படும் ஸ்ரீராமானுஜர், குருவிடம் மந்திர உபதேசம் பெற வேண்டி பலமுறை முயன்றார். ஸ்ரீரங்கத்தில் இருந்து திருக்கோஷ்டியூர்க்கு நடந்தே வந்தார். ஆனால் குருவின் பார்வை கிடைக்கவில்லை. ஸ்ரீராமானுஜரின் குரு திருக்கோஷ்டியூர் நம்பி.
அலைக்கழிப்புக்குப்பின், இந்த மந்திரத்தை யாருக்கும் சொல்லக்கூடாது என்ற நிபந்தனையுடன் எட்டெழுத்து மந்திரத்தை உபதேசித்தார் திருக்கோஷ்டியூர் நம்பி. மீறிச் சொன்னால், நரகத்துக்குச் செல்வாய் என எச்சரித்தார்.
மந்திரோபதேசம் முடிந்த கையுடன், விறுவிறுவென அருகில் உள்ள ஆலயத்துக்குச் சென்றார். உச்சிக்குச் சென்றவர், ஊர்மக்களை அழைத்தார். சத்தமாக, தனக்குக் கிடைஹ்த உபதேசத்தை எல்லோருக்கும் சொல்லிக் கொடுத்தார்.
உபதேசித்த அந்த மந்திரத்தை, தான் மட்டும் ஜபித்து வைகுண்டம் செல்வது முறையல்ல என்றெண்ணிய ராமானுஜர், குருவுக்குக் கொடுத்த வாக்குறுதியையும் மீறி,
நரகம் சென்றாலும் பரவாயில்லை மக்கள் அனைவரும் வைகுந்தம் செல்லும் பாக்கியத்தை அடையவேண்டும் என்று, ஓம் நமோ நாராயணாய என்ற மந்திரத்தை உரத்த குரலில் கூறியருளினார்.
இதை அறிந்து ஆவேசமானார் நம்பி. குருவின் கட்டளையை மீறிவிட்டாய் கொடுத்த வாக்குறுதியை மதிக்காததால் நீ நரகம் செல்வாய் என்று சாபம் கொடுத்தார். ஆனால் ராமானுஜர் தன் இறுதிக்காலம் வரை வைணவத்திற்குத் தொண்டு செய்து பரமபதம் அடைந்தார்!
