கோவிலில் இருந்து கொண்டு வரும் பூக்களை வீட்டின் பூஜை அறையில் வைப்பது குடும்பத்தில் சுபிட்சத்தையும், நல்ல
அதிர்வுகளையும் கொண்டு வரும் என்பது காலம் காலமாக நம் முன்னோர்களால் நம்பப்பட்டு வரும் ஒரு விஷயமாகும். இந்த
நம்பிக்கைக்குப் பின்னால் இருக்கும் சுவாரசியமான ஆன்மீகக் கருத்துக்களைப் பற்றி ஆன்மீகம் சார்ந்த இந்த பதிவில் தொடர்ந்து
பகிர்ந்து கொள்கிறோம்.
கோவிலில் கொடுத்த பூக்களை நம் வீட்டின் பூஜை அறையில் வைப்பதால் வரும் நன்மைகள் பலவாகும். கோவிலில் இறைவனுக்குச்
சாத்தப்பட்டு, பின்னர் பிரசாதமாக நமக்குக் கிடைக்கும் பூக்கள், வெறும் மலர்கள் மட்டுமல்ல! அவை இறைவனின்
அனுகிரகத்தையும், தெய்வீக சக்தியையும் உள்வாங்கிய புனிதப் பொருட்கள். இந்தப் பூக்களை நாம் வீட்டிற்குக் கொண்டு வந்து
பூஜை அறையில் வைக்கும் போது, பல நன்மைகள் ஏற்படுகின்றன. வெறும் தரையில் வைக்காமல், ஒரு சிறிய தட்டு அல்லது
தாம்பாளத்தில் வையுங்கள்.
கோவிலின் தெய்வீகச் சூழலில் இருந்து வரும் பூக்கள், அங்கு சொல்லப்படும் மந்திரங்களின் அதிர்வலைகளை உள்வாங்கிக் கொண்டு, தங்கள் உடன் நேர்மறை ஆற்றலை வீட்டிற்குள் கொண்டு வருகின்றன. இது வீட்டின் ஒட்டுமொத்த அதிர்வுகளையும் உயர்த்தி, அமைதியையும், நல்லிணக்கத்தையும் உண்டாக்குகிறது. இறைவனுக்கு அர்ப்பணிக்கப்பட்ட பூக்களை நாம் வீட்டில் வைக்கும் போது, இறைவனின் அருளும், ஆசியும் நம் குடும்பத்திற்கு கிடைப்பதாக நம்பப்படுகிறது. இது குடும்ப உறுப்பினர்களுக்கு ஏற்படும் சங்கடங்களைக் குறைத்து, சுபகாரியங்களுக்கு வழி வகுக்கும்.
கோவிலில் இருந்து வரும் பூக்கள், குடும்பத்தில் செல்வச் செழிப்பையும், சுபிட்சத்தையும் கொண்டு வரும் என்ற நம்பிக்கை பரவலாக உள்ளது. குறிப்பாக, பட்டுப்போகாத புதிய பூக்களை பூஜை அறையில் வைப்பது வீட்டிற்குள் லட்சுமி கடாட்சத்தை ஏற்படுத்தும் என்று கூறப்படுகிறது. இந்தப் பூக்களை வைப்பதன் மூலம் நம்முடைய இறை நம்பிக்கை மேலும் வலுப்பெறுகிறது. இது வாழ்க்கையின் சவால்களை எதிர்கொள்ள நமக்கு ஆன்மீக பலத்தையும், தன்னம்பிக்கையையும் அளிக்கிறது.
பூஜை அறையில் தெய்வீகப் பூக்களைக் காணும் போது, ஒருவித மன அமைதியும், ஆத்ம திருப்தியும் உண்டாகும். இது மன அழுத்தத்தைக் குறைத்து, நேர்மறை எண்ணங்களை வளர்க்கும். நாம் தனிப்பட்ட ஆள் கிடையாது, நம்மை இறைவன் பார்த்துக் கொண்டிருக்கிறார். இறைவனுடைய அனுக்கிரகம் நம்மை தொடர்ந்து கொண்டிருக்கிறது என்கிற தெம்பு வரும். கோவிலில் கொடுக்கப்படும் பூக்களை பெண்கள் தலையில் வைத்துக் கொள்ளலாம். கோவில் கொடுக்கப்படும் இந்த பூக்களை கொண்டு வந்து ஒருபோதும், வீட்டில் இருக்கும் தெய்வங்களுக்கு சாற்றக் கூடாது.
கோவிலில் இருந்து பூக்களைப் பெற்றதும், அவற்றை நேரடியாக வீட்டின் பூஜை அறையில் உள்ள சுவாமி படங்களின் முன் வைக்கலாம். பூக்கள் வாடியதும், அவற்றை பத்திரமாக எடுத்து ஏதாவது ஒரு செடியின் அடியிலோ, அல்லது நீர்நிலைகளிலோ விட்டு விடலாம். புனிதமான பூக்களை குப்பையில் போடக்கூடாது என்பதை நினைவில் கொள்ளுங்கள். இந்த எளிய செயல், நம் வீடுகளுக்குள் நேர்மறை ஆற்றலையும், இறைவனின் அருளையும் கொண்டு வந்து, குடும்பத்தில் நன்மைகளை நிச்சயம் உருவாக்கும். இந்த ஆன்மீக வழியைப் பின்பற்றி உங்கள் குடும்பத்தில் சுபிட்சத்தை உருவாக்க இறைவனைப் பிரார்த்திப்போம்.
